ممبئی( شو بز ڈیسک)بھارتی فلم ساز انیس بزمی نے فلم نو انٹری 2 میں تاخیر سے متعلق خبروں پر ردعمل دیتے ہوئے کہا ہے کہ منصوبے پر کام جاری ہے اور فلم درست سمت میں آگے بڑھ رہی ہے۔بھارتی میڈیا سے گفتگو میں انیس بزمی کا کہنا تھا کہ بعض فلموں کو مکمل ہونے میں توقع سے زیادہ وقت لگ جاتا ہے، تاہم پوری ٹیم اس منصوبے کو پایۂ تکمیل تک پہنچانے کے لیے کوشاں ہے۔ انہوں نے کہا کہ کچھ فلموں کی تیاری جلد مکمل ہو جاتی ہے جبکہ بعض کو زیادہ وقت درکار ہوتا ہے، لیکن ان کی خواہش ہے کہ یہ فلم ضرور بنے۔ہدایت کار نے بتایا کہ انہیں اس فلم سے خاص لگاؤ ہے اور وہ اسے اپنی بہترین تحریروں میں شمار کرتے ہیں۔ ان کے مطابق فلم سے وابستہ تمام افراد اس منصوبے کے لیے پُرجوش ہیں اور انہیں امید ہے کہ ناظرین اس پیشکش کو پسند کریں گے۔رپورٹس کے مطابق فلم کے نئے حصے میں ورون دھون، ارجن کپور اور دلجیت دوسانجھ کو مرکزی کرداروں کے لیے زیر غور لایا گیا تھا۔ تاہم گزشتہ چند ماہ کے دوران فلم کی کاسٹ اور شیڈول کے حوالے سے مختلف قیاس آرائیاں سامنے آتی رہی ہیں۔اس سے قبل بونی کپور نے تصدیق کی تھی کہ دلجیت دوسانجھ شیڈول میں مطابقت نہ ہونے کے باعث فلم سے الگ ہو گئے ہیں، جبکہ بعض رپورٹس میں ورون دھون کی علیحدگی کا دعویٰ بھی کیا گیا۔تاہم اب تک فلم کی حتمی کاسٹ اور نئے شیڈول کے بارے میں کوئی باضابطہ اعلان سامنے نہیں آیا۔
