یامی گوتم نے فلم “حق” کے کردار کے لیے قرآن پاک کا گہرا مطالعہ کیا: ہدایت کار کا انکشاف

کراچی( شو بز ڈیسک)بالی ووڈ فلم “حق” کے ہدایت کار سپرن ورما نے انکشاف کیا ہے کہ اداکارہ یامی گوتم نے اپنے کردار شازیہ بانو کو بہتر انداز میں نبھانے کے لیے قرآن پاک کا باقاعدہ مطالعہ کیا۔برطانوی نشریاتی ادارے کو دیے گئے انٹرویو میں انہوں نے بتایا کہ یامی گوتم نے کردار کی تیاری کے دوران قرآن کو سمجھنے میں تقریباً چار ماہ صرف کیے تاکہ وہ کردار کی نفسیات اور پس منظر کو بہتر طور پر سمجھ سکیں۔ہدایت کار کے مطابق فلم میں قرآنی حوالہ جات بھی شامل کیے گئے ہیں اور فلم کا اختتام بھی ایک اہم عربی لفظ پر کیا گیا ہے۔سپرن ورما نے کہا کہ ان کا مقصد غلط فہمیوں اور غلط معلومات کو دور کرتے ہوئے کہانی کو زیادہ حقیقت پسند اور معلوماتی بنانا تھا۔ ان کے مطابق اسلامی قوانین اور معاشرتی پہلوؤں کو سمجھنے میں کافی وقت صرف کیا گیا۔انہوں نے یہ بھی کہا کہ فلم میں خواتین کے حقوق اور سماجی مسائل کو اجاگر کیا گیا ہے اور یہ دکھایا گیا ہے کہ وقت گزرنے کے باوجود خواتین کو آج بھی مختلف چیلنجز کا سامنا ہے۔واضح رہے کہ فلم “حق” ایک حقیقی واقعے سے متاثر کہانی پر مبنی ہے جس میں یامی گوتم اور عمران ہاشمی مرکزی کردار ادا کر رہے ہیں۔