عثمان خان پی ایس ایل میں سب سے زیادہ سنچریاں بنانے والے کھلاڑی بن گئے

لاہور ( سپورٹس ڈیسک)پاکستان سپر لیگ کے گیارہویں ایڈیشن میں حیدرآباد کنگزمین کی نمائندگی کرنے والے عثمان خان نے شاندار کارکردگی کا مظاہرہ کرتے ہوئے ایک بڑا اعزاز اپنے نام کر لیا ہے۔تفصیلات کے مطابق عثمان خان پاکستان سپر لیگ کی تاریخ میں سب سے زیادہ سنچریاں بنانے والے بلے باز بن گئے ہیں۔ انہوں نے ملتان سلطانز کے خلاف میچ میں دو سو چودہ رنز کے ہدف کے تعاقب میں سینتالیس گیندوں پر ایک سو ایک رنز کی جارحانہ اننگز کھیلی۔یہ ان کے کیریئر کی چوتھی سنچری ہے جس کے ساتھ ہی وہ لیگ کی تاریخ میں سب سے زیادہ سنچریاں بنانے والے کھلاڑی بن گئے ہیں۔عثمان خان نے مجموعی طور پر تینتیس میچز کھیلے ہیں۔ اس سے قبل انہوں نے دو ہزار تئیس میں ایک اور دو ہزار چوبیس میں دو سنچریاں اسکور کی تھیں۔اس سے پہلے بابر اعظم، فخر زمان، کامران اکمل اور رائلی روسو تین، تین سنچریوں کے ساتھ اس فہرست میں شامل تھے۔