غیر مجاز کلینیکل پریکٹس غیر قانونی قرار، پی ایم ڈی سی کا وزارتِ صحت کو خط

اسلام آباد( ہیلتھ ڈیسک)پاکستان میڈیکل اینڈ ڈینٹل کونسل نے غیر مجاز کلینیکل پریکٹس کو غیر قانونی قرار دیتے ہوئے وزارتِ صحت کو خط ارسال کر دیا ہے۔پی ایم ڈی سی کے مطابق فارماسسٹ، سائیکالوجسٹ اور ڈینٹل ٹیکنیشنز کی جانب سے کلینیکل پریکٹس قانوناً قابلِ اجازت نہیں ہے۔ ادارے نے واضح کیا ہے کہ تشخیص اور علاج صرف رجسٹرڈ ڈاکٹرز اور ڈینٹسٹس کا اختیار ہے۔خط میں کہا گیا ہے کہ غیر مستند علاج اور اتائیت کے بڑھتے ہوئے رجحان سے ایچ آئی وی اور ہیپاٹائٹس جیسے خطرناک امراض کے پھیلنے کا خدشہ ہے۔پی ایم ڈی سی نے مزید کہا ہے کہ الائیڈ ہیلتھ پروفیشنلز دوا تجویز کرنے کے مجاز نہیں اور ایسی سرگرمیاں انسانی جانوں کے لیے خطرہ ہیں۔ ادارے نے متعلقہ افراد کو فوری طور پر اس قسم کی غیر مجاز پریکٹس روکنے کی ہدایت بھی جاری کی ہے۔