پی ایس ایل میں کارکردگی توقعات کے مطابق نہیں رہی، سعود شکیل کا اعتراف

لاہور ( سپورٹس ڈیسک)کوئٹہ گلیڈی ایٹرز کے کپتان سعود شکیل نے کہا ہے کہ پی ایس ایل میں ٹیم کی کارکردگی اس معیار کی نہیں رہی جس کی توقع کی جا رہی تھی۔لاہور میں گفتگو کرتے ہوئے انہوں نے کہا کہ ٹیم نے جس منصوبہ بندی کے ساتھ ٹورنامنٹ شروع کیا تھا، نتائج اس کے مطابق نہیں آئے۔ ان کے مطابق اہم کھلاڑیوں کی کارکردگی بھی توقعات پر پوری نہیں اتر سکی۔سعود شکیل نے کہا کہ نئی نیلامی کے بعد ٹیم کا نیا کمبی نیشن بنا، جسے وقت دینا ہوگا۔ ان کے مطابق نوجوان کھلاڑی خواجہ نافع پر بھی زیادہ دباؤ آیا، تاہم انہیں ان تجربات سے سیکھنے کی ضرورت ہے۔انہوں نے اپنی کارکردگی پر بات کرتے ہوئے کہا کہ ان کا آغاز اچھا تھا لیکن بعد کے میچوں میں تسلسل برقرار نہ رہ سکا۔ ان کے مطابق وہ اپنی محنت جاری رکھیں گے اور مستقبل میں بہتر کارکردگی دکھانے کی کوشش کریں گے۔