پاکستان ویمن ٹیم کی شاندار فتح، زمبابوے کو 168 رنز سے شکست، سیریز میں 1-0 کی برتری

لاہور ( سپورٹس ڈیسک)پاکستان ویمن کرکٹ ٹیم نے زمبابوے کے خلاف پہلے ون ڈے انٹرنیشنل میچ میں شاندار کارکردگی دکھاتے ہوئے 168 رنز سے کامیابی حاصل کر لی اور تین میچوں کی سیریز میں 1-0 کی برتری بھی حاصل کر لی۔نیشنل بینک اسٹیڈیم کراچی میں کھیلے گئے میچ میں پاکستان ویمن ٹیم نے پہلے بیٹنگ کرتے ہوئے 50 اوورز میں 5 وکٹوں کے نقصان پر 330 رنز بنائے، جو اس گراؤنڈ پر ویمن کرکٹ کا سب سے بڑا اسکور بھی قرار پایا۔پاکستان کی جانب سے گل فیروزہ اور صدف شمس نے شاندار آغاز فراہم کیا اور پہلی وکٹ پر 162 رنز کی پارٹنرشپ قائم کی۔ گل فیروزہ نے 50 رنز اسکور کیے جبکہ صدف شمس صرف 2 رنز کی کمی سے سنچری مکمل نہ کر سکیں اور 98 رنز کی دلکش اننگز کھیلیں۔سدرہ امین نے بھی ذمہ دارانہ بیٹنگ کرتے ہوئے 67 رنز بنائے، جبکہ نجیہ علوی 56 رنز کے ساتھ ناقابل شکست رہیں۔ کپتان فاطمہ ثنا نے بھی مختصر مگر جارحانہ اننگز کھیلی۔ہدف کے تعاقب میں زمبابوے کی ٹیم پاکستان بولنگ کے سامنے زیادہ مزاحمت نہ دکھا سکی اور 36.4 اوورز میں 162 رنز پر ڈھیر ہوگئی۔ مہمان ٹیم کی جانب سے بلونڈا بیزا 53 رنز کے ساتھ نمایاں رہیں۔پاکستان کی جانب سے باولرز نے بھی بہترین کارکردگی دکھائی اور ٹیم کو بڑی فتح دلانے میں اہم کردار ادا کیا۔