پاکستان انڈر سولہ فٹبال ٹیم پہلی بار یوئیفا ڈیولپمنٹ ٹورنامنٹ میں شریک، قازقستان روانہ

لاہور ( سپورٹس ڈیسک)پاکستان فٹبال میں ایک نئی تاریخ رقم ہو گئی ہے، انڈر سولہ فٹبال ٹیم پہلی مرتبہ یوئیفا ڈیولپمنٹ ٹورنامنٹ میں شرکت کے لیے قازقستان روانہ ہو گئی ہے۔پاکستان فٹبال فیڈریشن کے صدر محسن گیلانی نے اس پیش رفت کو پاکستان فٹبال کے لیے ایک بڑا سنگ میل قرار دیتے ہوئے کہا ہے کہ یوئیفا ایونٹ میں شرکت ایک اہم کامیابی اور بڑا موقع ہے۔ ان کے مطابق یہ لمحہ پاکستان فٹبال کی تاریخ میں نمایاں حیثیت رکھتا ہے۔انہوں نے مزید کہا کہ پاکستان میں فٹبال کے فروغ اور ترقی کے لیے مسلسل کوششیں جاری ہیں اور ایسے بین الاقوامی ایونٹس نوجوان کھلاڑیوں کے لیے سیکھنے اور اپنی صلاحیتیں نکھارنے کا بہترین موقع فراہم کرتے ہیں۔ٹورنامنٹ چوبیس سے تیس اپریل تک جاری رہے گا۔ پاکستان اپنا پہلا میچ پچیس اپریل کو قازقستان کے خلاف کھیلے گا، جبکہ ستائیس اپریل کو روس اور تیس اپریل کو آذربائیجان کے خلاف میدان میں اترے گا۔