کیپ ٹاؤن میراتھون 2026 میں پاکستانی رنرز کی شاندار کارکردگی، عالمی سطح پر نمایاں کامیابی

جنوبی افریقہ( سپورٹس ڈیسک)جنوبی افریقہ میں منعقد ہونے والی کیپ ٹاؤن میراتھون میں پاکستانی رنرز نے شاندار کارکردگی دکھاتے ہوئے عالمی میراتھون منظرنامے پر اپنی صلاحیتوں کا لوہا منوا لیا۔دلکش مناظر کے درمیان ہونے والی اس ریس میں دنیا بھر سے 27 ہزار سے زائد رنرز شریک ہوئے، جہاں پاکستانی کمیونٹی کے رنرز کی کارکردگی نمایاں رہی۔کراچی سے تعلق رکھنے والے رنر فیصل شفیع نے 42.195 کلومیٹر طویل میراتھون 3 گھنٹے، 35 منٹ اور 37 سیکنڈز میں مکمل کی۔ ان کی یہ کامیابی انہیں پاکستان میں رہتے ہوئے آٹھویں ورلڈ میراتھون اسٹار مکمل کرنے والے پہلے رنر کے طور پر نمایاں کرتی ہے۔فیصل شفیع نے ریس کے بعد گفتگو میں کہا کہ گزشتہ سال خراب موسم کے باعث یہ ریس مکمل نہ ہو سکی تھی، تاہم اس بار انہوں نے اپنا ہدف پورا کر لیا۔دوسری جانب برطانوی پاکستانی رنر ہما رحمٰن نے بھی شاندار کارکردگی دکھاتے ہوئے میراتھون 3 گھنٹے، 31 منٹ اور 34 سیکنڈز میں مکمل کی۔ وہ پاکستانی اور اوورسیز رننگ کمیونٹی میں سب سے تیز رنرز میں شامل رہیں۔ان کی دوڑ کو مستقل مزاجی اور مضبوط رفتار کی مثال قرار دیا جا رہا ہے، جہاں انہوں نے مختلف مراحل میں بہترین اسپلٹس کے ساتھ اپنی برتری برقرار رکھی۔اس ایونٹ میں دیگر پاکستانی رنرز بھی شریک ہوئے جنہوں نے اپنی اپنی سطح پر ریس مکمل کی اور عالمی ایونٹ میں پاکستانی شرکت کو مزید نمایاں بنایا۔ٹیبل ماؤنٹین کے سائے میں ہونے والی یہ ریس نہ صرف ایک کھیلوں کا مقابلہ تھا بلکہ پاکستانی رننگ کمیونٹی کے لیے ایک اہم سنگِ میل بھی ثابت ہوئی۔