لاہور ( سپورٹس ڈیسک)پاکستان ہاکی فیڈریشن نے قومی ہاکی ٹیم کے کھلاڑیوں کو مجموعی طور پر 4 کروڑ 50 لاکھ روپے کے واجبات ادا کر دیے ہیں، جس سے کھلاڑیوں کو بین الاقوامی مقابلوں سے قبل بڑا ریلیف ملا ہے۔فیڈریشن کی جانب سے پرو لیگ میں شرکت کے لیے قومی ٹیم کی روانگی سے قبل تمام کھلاڑیوں کے واجبات پیشگی ادا کیے گئے۔ اس رقم میں وزیر اعظم شہباز شریف کی جانب سے اعلان کردہ انعامی رقم، عالمی کپ میں رسائی کا بونس اور روزانہ الاؤنس شامل ہیں۔یہ پہلی مرتبہ ہے کہ کسی بین الاقوامی ایونٹ میں شرکت سے قبل قومی ہاکی ٹیم کے کھلاڑیوں کو ان کے تمام مالی واجبات مکمل طور پر ادا کیے گئے ہیں۔پاکستان ہاکی فیڈریشن کے سربراہ محی الدین وانی کے مطابق ہر کھلاڑی کو پرو لیگ کی مد میں تقریباً سات لاکھ روپے جبکہ عالمی کپ کے لیے کوالیفائی کرنے پر پندرہ لاکھ روپے فراہم کیے گئے ہیں۔انہوں نے بتایا کہ روزانہ الاؤنس کی مد میں بھی کھلاڑیوں کو 110 ڈالر فی کس ادا کیے گئے ہیں تاکہ انہیں بیرون ملک قیام کے دوران کسی مالی دشواری کا سامنا نہ ہو۔قومی ہاکی ٹیم 13 سے 20 جون تک بیلجیئم میں میزبان ٹیم اور اسپین کے خلاف پرو لیگ کے چار میچز کھیلے گی، جبکہ 23 سے 27 جون تک انگلینڈ میں بھارت اور انگلینڈ کے خلاف مزید چار میچز میں حصہ لے گی۔پرو لیگ کے بعد قومی ٹیم 14 سے 30 اگست تک نیدرلینڈز اور بیلجیئم میں ہونے والے عالمی ہاکی کپ میں شرکت کرے گی، جہاں گرین شرٹس اپنی صلاحیتوں کا مظاہرہ کریں گے۔
