نیو یارک( شوبز ڈیسک)ہالی ووڈ کی معروف اداکارہ انجلینا جولی اور اداکار بریڈ پٹ کے بڑے بیٹے میڈوکس نے اپنے نام سے والد کا خاندانی نام ہٹا کر قانونی طور پر نئی شناخت اختیار کر لی ہے۔ اب وہ صرف میڈوکس جولی کے نام سے جانے جائیں گے۔ذرائع کے مطابق میڈوکس نے مئی 2026 میں نام کی تبدیلی کے لیے قانونی کارروائی مکمل کرنے کی درخواست جمع کرائی تھی، تاہم وہ اس سے قبل بھی اپنے پیشہ ورانہ معاملات میں والدہ کا خاندانی نام استعمال کرتے رہے ہیں۔سن 2024 میں ریلیز ہونے والی فلم ’’ماریہ‘‘ میں انہیں میڈوکس جولی پٹ کے نام سے کریڈٹ دیا گیا تھا، جبکہ 2025 کی فلم ’’کوچیور‘‘ میں، جہاں انہوں نے تیسرے معاون ہدایت کار کے فرائض انجام دیے، ان کا نام صرف میڈوکس جولی درج کیا گیا۔میڈوکس سے قبل ان کے بعض بہن بھائی بھی والد کے خاندانی نام سے دوری اختیار کر چکے ہیں۔ اطلاعات کے مطابق انجلینا جولی اور بریڈ پٹ کے چھ بچوں میں سے کم از کم چار نے اپنے نام کے ساتھ پٹ کا استعمال ترک کر دیا ہے یا اسے عوامی سطح پر استعمال نہیں کرتے۔یاد رہے کہ انجلینا جولی اور بریڈ پٹ کی پہلی ملاقات 2003 میں فلم ’’مسٹر اینڈ مسز اسمتھ‘‘ کی عکس بندی کے دوران ہوئی تھی۔ دونوں نے 2014 میں شادی کی، تاہم دو سال بعد جولی نے طلاق کے لیے درخواست دائر کر دی تھی۔طلاق اور بچوں کی کفالت سے متعلق قانونی تنازعات کے دوران دونوں فریقوں کے درمیان مختلف الزامات بھی سامنے آئے۔ جولی نے بعض خاندانی معاملات پر تحفظات کا اظہار کیا، جبکہ بریڈ پٹ نے ان الزامات کی تردید کی۔ بعد ازاں پٹ نے یہ بھی اعتراف کیا کہ انہوں نے شراب نوشی چھوڑنے کے لیے بحالی پروگرام میں حصہ لیا تھا۔تجزیہ کاروں کے مطابق بچوں کی جانب سے ناموں میں کی جانے والی یہ تبدیلیاں اس بات کی عکاسی کرتی ہیں کہ خاندان کے بعض افراد اپنی شناخت کو والدہ کے خاندانی نام کے ساتھ منسلک رکھنے کو ترجیح دے رہے ہیں، تاہم اس حوالے سے خاندان نے تفصیلی مؤقف عوامی سطح پر جاری نہیں کیا۔
