لاہور ( سپورٹس ڈیسک) سائیکل چلانے کے شوقین افراد کے لیے ایک شاندار مقابلہ منعقد کیا گیا جس میں ملک بھر سے آنے والے کھلاڑیوں نے اپنی صلاحیتوں کا بھرپور مظاہرہ کیا۔پنجاب اسٹیڈیم لاہور سے شروع ہونے والی پچاس کلومیٹر طویل ریس میں پچاس سے زائد سائیکلسٹس نے حصہ لیا۔ یہ مقابلہ والٹن روڈ، کینال روڈ اور مال روڈ سے گزرتا ہوا لبرٹی چوک پر اختتام پذیر ہوا۔ ریس کے دوران کھلاڑیوں نے رفتار اور مہارت کا بہترین مظاہرہ کیا۔سخت اور دلچسپ مقابلے کے بعد پنجاب سے تعلق رکھنے والے محمد شکیل نے پہلی پوزیشن حاصل کر کے سونے کا تمغہ اور تیس ہزار روپے انعام اپنے نام کیا۔ پاک فوج کے ارسلان نے دوسری پوزیشن حاصل کر کے چاندی کا تمغہ جیتا جبکہ طلحہ خان نے تیسری پوزیشن حاصل کر کے کانسی کا تمغہ اور نقد انعام حاصل کیا۔سائیکلنگ تنظیم کے صدر خواجہ ادریس حیدر نے کہا کہ ملک میں سائیکلنگ کے فروغ کے لیے مزید اقدامات کیے جا رہے ہیں۔ ان کے مطابق جلد خواتین کے لیے بھی سائیکل ریس کا انعقاد کیا جائے گا جبکہ سال دو ہزار چھبیس میں مزید بڑے مقابلے بھی منعقد کیے جائیں گے۔
