ماؤنٹ ایورسٹ پر ایک روز میں سب سے زیادہ کامیاب چڑھائیاں، نیا عالمی ریکارڈ قائم

کھٹمنڈو ( سپورٹس ڈیسک)موسم سازگار ہوتے ہی ماؤنٹ ایورسٹ پر کوہ پیماؤں کی غیر معمولی سرگرمی دیکھنے میں آئی، جہاں ایک ہی روز میں 274 افراد نے دنیا کی بلند ترین چوٹی سر کر کے نیا ریکارڈ قائم کر دیا۔اس سے قبل ایک روز میں سب سے زیادہ کامیاب چڑھائیوں کا ریکارڈ 2019ء میں قائم ہوا تھا، جب 223 کوہ پیماؤں نے ایورسٹ سر کیا تھا۔رپورٹس کے مطابق نیپال نے رواں سیزن کے دوران 500 کلائمبنگ پرمٹ جاری کیے، جس کے باعث 8 ہزار میٹر سے بلند خطرناک ’ڈیتھ زون‘ میں بھی کوہ پیماؤں کی لمبی قطاریں دیکھی گئیں۔دوسری جانب 56 سالہ کیمی ریتا شیرپا نے 32 ویں مرتبہ ماؤنٹ ایورسٹ سر کر کے اپنا ہی عالمی ریکارڈ مزید بہتر بنا لیا۔اسی طرح 52 سالہ لکھپا شیرپا نے 11 ویں بار ایورسٹ سر کر کے خواتین میں نیا ریکارڈ قائم کیا۔ادھر دونوں ٹانگوں سے محروم روسی کوہ پیما رستم نبیئیف نے صرف ہاتھوں کے سہارے ماؤنٹ ایورسٹ سر کر کے دنیا بھر کی توجہ حاصل کر لی۔