انگلینڈ( سپورٹس ڈیسک)انگلینڈ اور بھارت کے درمیان آئندہ ٹی ٹوئنٹی سیریز کے بعض میچز کے اوقات کار میں تبدیلی کر دی گئی ہے۔کرکٹ ویب سائٹس کے مطابق انگلینڈ کرکٹ بورڈ نے یہ فیصلہ ٹیلی ویژن ویورشپ میں اضافے کے پیش نظر کیا ہے، جس کے تحت 5 میچوں پر مشتمل سیریز کے 3 میچز کے آغاز کے اوقات تبدیل کیے گئے ہیں۔پہلے شیڈول کے مطابق میچز انگلینڈ کے وقت کے مطابق شام 6:30 بجے اور بھارت کے مقامی وقت کے مطابق رات 11 بجے شروع ہونا تھے۔ تاہم نئے شیڈول کے تحت اب کچھ میچز شام 5:30 بجے (انگلینڈ وقت) اور رات 10 بجے (بھارت وقت) شروع ہوں گے۔رپورٹس کے مطابق اس تبدیلی کا مقصد براہِ راست نشریات کے دوران زیادہ ناظرین کو متوجہ کرنا ہے۔واضح رہے کہ بھارتی کرکٹ ٹیم یکم جولائی سے 19 جولائی تک انگلینڈ کا دورہ کرے گی، جہاں وہ میزبان ٹیم کے خلاف ٹی ٹوئنٹی سیریز کھیلے گی۔
