لاہور ( سپورٹس ڈیسک)اولمپک گولڈ میڈلسٹ جیولین تھرور ارشد ندیم کی دوحہ ڈائمنڈ لیگ میں شرکت ابھی غیر یقینی ہے، اور وہ اس حوالے سے آئندہ آٹھ سے دس دن میں حتمی فیصلہ کریں گے۔ارشد ندیم نے کہا ہے کہ رواں سیزن میں ان کی توجہ بڑے مقابلوں پر مرکوز ہے، جن میں ایشیائی کھیل، دولتِ مشترکہ کھیل اور عالمی ایتھلیٹکس مقابلے شامل ہیں۔انہوں نے حج کی سعادت حاصل کرنے کے بعد کوچ سلمان اقبال بٹ کی نگرانی میں لاہور کے پنجاب اسٹیڈیم میں دوبارہ تربیت کا آغاز کر دیا ہے۔ٹریننگ کے دوران گفتگو کرتے ہوئے ارشد ندیم نے واضح کیا کہ وہ 19 جون کو ہونے والی دوحہ ڈائمنڈ لیگ میں شرکت سے متعلق ابھی کوئی حتمی فیصلہ نہیں کر سکے، اور آئندہ چند روز کی تیاری کے بعد صورتحال کا جائزہ لے کر فیصلہ کریں گے۔ان کا کہنا تھا کہ وہ اپنی جسمانی کارکردگی اور تیاری کو دیکھ کر ہی آئندہ مقابلوں میں شرکت کا فیصلہ کریں گے۔ارشد ندیم نے یہ بھی کہا کہ حال ہی میں سری لنکا کے جیولین تھرور کی جانب سے 92 میٹر سے زائد تھرو نے انہیں مزید محنت پر آمادہ کیا ہے، کیونکہ عالمی سطح پر مقابلہ مزید سخت ہو گیا ہے۔انہوں نے مزید کہا کہ وہ حج کی سعادت حاصل کرنے پر خود کو خوش قسمت سمجھتے ہیں اور اس روحانی سفر کے بعد ذہنی طور پر خود کو ہلکا اور پُرسکون محسوس کر رہے ہیں، جبکہ انہوں نے دوبارہ بھرپور تربیت شروع کر دی ہے۔
