انو کپور کا اوم پوری پر اپنی بہن کو دھوکا دینے کا الزام

ممبئی( شو بز ڈیسک)بالی ووڈ کے معروف اداکار انو کپور نے آنجہانی اداکار اوم پوری پر اپنی بہن کے ساتھ دھوکا دہی کا الزام عائد کیا ہے۔بھارتی میڈیا کے مطابق ایک حالیہ انٹرویو میں انو کپور نے اوم پوری کے ساتھ اپنے تعلقات پر کھل کر بات کرتے ہوئے انہیں ایک عظیم اداکار قرار دیا، تاہم ساتھ ہی ان کی نجی زندگی پر تنقید بھی کی۔انو کپور نے کہا کہ اوم پوری نے ان کی بہن کی زندگی متاثر کی اور انہیں دھوکا دیا، جس پر وہ شدید رنجیدہ رہے۔ ان کے مطابق یہ تعلق بعد میں ختم ہو گیا تھا، تاہم کچھ عرصے بعد دونوں کے درمیان دوبارہ رابطہ بھی ہوا۔انہوں نے مزید کہا کہ ان کی بہن نے مشکل وقت میں اوم پوری کا خیال رکھا، جس پر انہیں اپنی بہن سے بھی ناراضی ہوئی۔واضح رہے کہ اوم پوری اور سیما کپور کی شادی مختصر مدت تک قائم رہی تھی جو بعد میں ختم ہو گئی تھی۔