شمالی وزیرستان میں سیکیورٹی فورسز کی کارروائی، مطلوب ٹی ٹی پی کمانڈر ہلاک
شمالی وزیرستان: سیکیورٹی فورسز نے شمالی وزیرستان کے علاقے اسپن وام میں انٹیلی جنس بیسڈ آپریشن کے دوران ایک انتہائی مطلوب دہشتگرد کمانڈر سمیت پانچ دہشتگردوں کو ہلاک کر دیا۔
سیکیورٹی ذرائع کے مطابق کارروائی میں ہلاک ہونے والا کمانڈر عمر عرف جان میر عرف ثاقب طور فتنہ الخوارج کا اہم رہنما تھا، جس کے سر کی قیمت 30 لاکھ روپے مقرر تھی۔
ذرائع کا کہنا ہے کہ ہلاک دہشتگرد سیکیورٹی فورسز اور شہریوں پر متعدد حملوں کی منصوبہ بندی میں ملوث تھا۔
سیکیورٹی حکام کے مطابق عمر عرف ثاقب طور نے اسپن وام کے علاقے بوبالی مسجد کے اطراف زیرِ زمین بنکرز، سرنگیں اور بارودی جال بچھا رکھے تھے۔
ذرائع نے بتایا کہ سیکیورٹی فورسز نے مربوط کارروائی کرتے ہوئے دہشتگردوں کے ٹھکانوں کا محاصرہ کیا، جس کے بعد تمام دہشتگرد مارے گئے۔
سیکیورٹی تجزیہ کاروں نے اس کارروائی کو فتنہ الخوارج کے لیے بڑا دھچکا قرار دیتے ہوئے کہا کہ اس سے علاقے میں امن و استحکام کے قیام میں مدد ملے گی۔
ماہرین کے مطابق آپریشن “عزمِ استحکام” کے تحت فتنہ الخوارج اور فتنہ الہندوستان کے خلاف ملک بھر میں انسدادِ دہشتگردی کارروائیاں کامیابی سے جاری ہیں۔