ممبئی( سپورٹس ڈیسک) فکسنگ کے الزامات کی زد میں رہنے والی انڈین پریمیئر لیگ میں ایک اور واقعے نے لیگ کی شفافیت اور ساکھ پر سوالات اٹھا دیے ہیں۔ممبئی انڈینز اور کولکتہ نائٹ رائیڈرز کے درمیان کھیلے گئے میچ میں فیلڈرز کی مشکوک حرکت نے اسٹیڈیم میں موجود شائقین کو حیران کر دیا۔دسویں اوور میں ممبئی انڈینز کے کپتان ہاردک پانڈیا کی گیند پر رومن پاول نے بڑا شاٹ کھیلنے کی کوشش کی، تاہم گیند ٹاپ ایج لگنے کے بعد ہوا میں بلند ہو گئی۔ڈیپ فائن لیگ اور ڈیپ اسکوائر لیگ پر موجود فیلڈرز کیچ لینے کے لیے دوڑے، لیکن حیرت انگیز طور پر دونوں کھلاڑی قریب پہنچ کر رک گئے اور کیچ پکڑنے کی کوشش نہیں کی۔اس واقعے کے بعد سوشل میڈیا پر مختلف آراء سامنے آ رہی ہیں، جبکہ شائقین نے اس رویے کو غیر معمولی قرار دیتے ہوئے سوالات اٹھا دیے ہیں۔
