ایف سی ہیڈکوارٹر حملے کا ماسٹر مائنڈ بلوچستان آپریشن میں ہلاک

ایف سی ہیڈکوارٹر حملے کا ماسٹر مائنڈ بلوچستان آپریشن میں ہلاک

کوئٹہ: سیکیورٹی فورسز نے بلوچستان کے ضلع پشین میں انٹیلی جنس بیسڈ آپریشن کے دوران کالعدم تحریک طالبان پاکستان (ٹی ٹی پی) کے ایک اہم کمانڈر کو ہلاک کر دیا، حکام نے جمعرات کو تصدیق کی۔

فرنٹیئر کور (ایف سی) حکام کے مطابق ہلاک ہونے والے شدت پسند کمانڈر کی شناخت بصیر کے نام سے ہوئی ہے، جو مبینہ طور پر کوئٹہ میں ایف سی ہیڈکوارٹر پر ہونے والے خودکش حملے کا ماسٹر مائنڈ تھا۔ اس حملے میں ایف سی کے تین اہلکاروں سمیت 10 شہری جاں بحق ہوئے تھے۔

حکام کا کہنا ہے کہ انٹیلی جنس اداروں کو اطلاع ملی تھی کہ ملزم کوئٹہ ضلع کے علاقے شاہبان کے زرغون غر میں موجود ہے، جہاں وہ مبینہ طور پر ایک اور بڑے حملے کی منصوبہ بندی کر رہا تھا۔

اطلاع ملنے پر ایف سی اہلکاروں نے علاقے میں ٹارگٹڈ آپریشن کیا۔ سیکیورٹی حکام کے مطابق فورسز اور شدت پسندوں کے درمیان تقریباً دو گھنٹے تک شدید فائرنگ کا تبادلہ جاری رہا، جس کے نتیجے میں کمانڈر بصیر ہلاک جبکہ ایک اور مشتبہ شدت پسند کو گرفتار کر لیا گیا۔

حکام کے مطابق بصیر کوئٹہ اور گردونواح میں ہونے والی متعدد دہشتگرد کارروائیوں میں بھی مطلوب تھا اور وہ علاقے میں شدت پسند نیٹ ورکس اور دراندازی کی سرگرمیوں میں ملوث رہا تھا۔

سیکیورٹی حکام نے مزید بتایا کہ ایف سی ہیڈکوارٹر خودکش حملے کی تحقیقات کے دوران اب تک کم از کم 15 مشتبہ افراد کو گرفتار کیا جا چکا ہے۔

حکام نے اس کارروائی کو بلوچستان میں امن و استحکام کے قیام کے لیے جاری انسدادِ دہشتگردی مہم کی ایک بڑی کامیابی قرار دیا۔