ایس ایل کے رات کے میچز فلڈ لائٹس میں کرانے کا معاملہ عدالت پہنچ گیا

لاہور ( سپورٹس ڈیسک) ملک بھر میں بجلی کی غیر اعلانیہ لوڈ شیڈنگ کے باعث پی ایس ایل کے رات کے میچز فلڈ لائٹس میں کرانے کا معاملہ عدالت پہنچ گیا۔لاہور ہائی کورٹ میں رات کے وقت پی ایس ایل میچز فلڈ لائٹس میں منعقد کرنے کے خلاف دائر درخواست پر سماعت ہوئی۔ سماعت جسٹس چوہدری محمد اقبال نے شہری اشبا کامران کی درخواست پر کی۔درخواست میں وفاقی حکومت، پاکستان کرکٹ بورڈ اور وزارت پانی و بجلی کو فریق بنایا گیا ہے اور موقف اختیار کیا گیا ہے کہ ملک میں شدید بجلی بحران جاری ہے۔ درخواست میں کہا گیا ہے کہ حکومت کی جانب سے غیر اعلانیہ لوڈ شیڈنگ کا شیڈول جاری کیا گیا ہے جس سے کاروباری سرگرمیاں اور شہری زندگی متاثر ہو رہی ہے۔درخواست گزار نے مؤقف اختیار کیا کہ پی ایس ایل کے میچز فلڈ لائٹس میں کرانا بنیادی انسانی حقوق کے منافی ہے۔ ان کے مطابق پاکستان کرکٹ بورڈ ایک خودمختار ادارہ ہے جو وفاقی حکومت کے دائرہ کار میں آتا ہے، ایک طرف بجلی کی بچت کی بات کی جا رہی ہے جبکہ دوسری طرف رات کے وقت فلڈ لائٹس میں میچز کروائے جا رہے ہیں۔درخواست میں استدعا کی گئی ہے کہ پی ایس ایل کے میچز دن کی روشنی میں کرانے سے بجلی کی بچت ممکن ہے، لہٰذا عدالت رات کے وقت میچز پر پابندی عائد کرے اور انہیں دن میں کرانے کا حکم دے۔ ساتھ ہی یہ بھی کہا گیا کہ اس معاملے کی انکوائری بھی کروائی جائے۔پاکستان کرکٹ بورڈ کے وکیل نے درخواست کی مخالفت کرتے ہوئے مؤقف اختیار کیا کہ بورڈ جنریٹرز کے ذریعے میچز کراتا ہے اور قومی بجلی کا استعمال نہیں کیا جاتا۔عدالت نے پاکستان کرکٹ بورڈ کے وکیل کو جواب جمع کرانے کی ہدایت کرتے ہوئے سماعت پانچ مئی تک ملتوی کر دی۔