امریکی محکمہ خارجہ نے ایک بھارتی آن لائن فارمیسی کمپنی سے وابستہ 13 افراد پر ویزا پابندیاں عائد کر دی ہیں۔ امریکی حکام کے مطابق یہ افراد ایک ایسے بین الاقوامی نیٹ ورک سے منسلک تھے جو جعلی نسخہ جاتی ادویات فروخت کر رہا تھا جن میں انتہائی خطرناک مصنوعی منشیات 'فینٹانائل' کی آمیزش پائی گئی۔
غیر ملکی خبر رساں ادارے رائٹرز کے مطابق، یہ افراد بھارتی کمپنی ”کے ایس انٹرنیشنل ٹریڈرز“ اور اس کے مالک کے قریبی ساتھی بتائے جاتے ہیں۔ امریکی حکام کا کہنا ہے کہ مذکورہ کمپنی آن لائن فارمیسی کے ذریعے جعلی گولیاں فروخت کر رہی تھی جن میں فینٹانائل شامل تھا۔
فینٹانائل ایک انتہائی طاقتور مصنوعی اوپیئڈ ہے جو طبی لحاظ سے درد کے علاج کے لیے استعمال ہوتا ہے، تاہم امریکہ میں اس کے غیر قانونی استعمال اور منشیات کے طور پر فروخت نے ایک سنگین بحران پیدا کر رکھا ہے، جس کے نتیجے میں ہر سال ہزاروں افراد ہلاک ہو جاتے ہیں۔ یہ پابندیاں امریکی حکومت کی جانب سے غیر قانونی ادویات اور منشیات کی سپلائی چین کو توڑنے کی حکمت عملی کا حصہ ہیں۔