جامعہ بلوچستان اور محکمہ لائیو سٹاک کا معاہدہ، مویشیوں کی صحت میں بہتری کی راہ ہموار

کوئٹہ ( بلو چستان خبر) جامعہ بلوچستان اور محکمہ لائیو سٹاک کے درمیان باہمی تعاون کو فروغ دینے کے لیے مفاہمتی یادداشت پر دستخط کر دیے گئے۔ اس موقع پر منعقدہ تقریب میں وائس چانسلر ظہور احمد بازئی نے بتایا کہ جامعہ بلوچستان سالانہ دس کروڑ ویکسین تیار کرنے کی صلاحیت رکھتی ہے، جس سے صوبے میں مویشیوں کی صحت کے نظام کو مضبوط بنانے میں مدد ملے گی۔صوبائی وزیر لائیو سٹاک فیصل جمالی نے اس معاہدے کو ایک اہم پیش رفت قرار دیتے ہوئے کہا کہ اس سے لائیو سٹاک کے شعبے میں بہتری آئے گی اور کسانوں کو براہ راست معاشی فائدہ حاصل ہوگا، جبکہ خوراک کے تحفظ کو یقینی بنانے میں بھی یہ اقدام معاون ثابت ہوگا۔اجلاس کے دوران ویکسین کی تیاری، معیار اور ترسیل کے مختلف پہلوؤں پر تفصیلی بریفنگ دی گئی، جبکہ تحقیق، تربیت اور تکنیکی تعاون کو مزید بڑھانے پر اتفاق کیا گیا۔حکام کے مطابق اس معاہدے کے ذریعے جامعہ بلوچستان کی سائنسی تحقیق کو عملی میدان میں لا کر صوبے کی ترقی سے جوڑا جائے گا، جس سے نہ صرف لائیو سٹاک کا شعبہ مستحکم ہوگا بلکہ مجموعی معاشی سرگرمیوں میں بھی اضافہ متوقع ہے۔ تقریب میں اعلیٰ حکام اور ماہرین نے شرکت کی اور آخر میں یادگاری شیلڈز بھی پیش کی گئیں۔