کوئٹہ: بلوچستان کے اضلاع گوادر اور کیچ میں مختلف واقعات کے دوران تین افراد کی لاشیں برآمد ہوئی ہیں، جبکہ ڈیرہ بگٹی میں ایک قبائلی رہنما کے گھر پر فائرنگ کے نتیجے میں ان کا بیٹا زخمی ہو گیا۔
پسنی میں دو افراد کی لاشیں برآمد
پولیس کے مطابق ضلع گوادر کے علاقے پسنی میں مکران کوسٹل ہائی وے پر چاربندان کراس کے قریب مقامی افراد کی اطلاع پر دو لاشیں برآمد کی گئیں۔
متوفیان کی شناخت پروفیسر محمد سراج کلانچی اور سردال کے نام سے ہوئی ہے۔ پولیس کا کہنا ہے کہ نامعلوم مسلح افراد نے مبینہ طور پر دونوں افراد کو فائرنگ کرکے قتل کیا اور لاشیں موقع پر چھوڑ کر فرار ہوگئے۔
لاشوں کو قانونی کارروائی کے لیے مقامی اسپتال منتقل کیا گیا، جہاں ضروری کارروائی مکمل ہونے کے بعد انہیں ورثا کے حوالے کر دیا گیا۔
کیچ میں ایک اور لاش ملی
دوسری جانب ضلع کیچ کے علاقے دشت خدان سے عطاء اللہ نامی شخص کی لاش برآمد ہوئی۔ پولیس نے لاش کو اسپتال منتقل کیا جہاں قانونی کارروائی مکمل کرنے کے بعد اسے اہل خانہ کے حوالے کر دیا گیا۔
ڈیرہ بگٹی میں فائرنگ
ادھر ضلع ڈیرہ بگٹی کے علاقے شاخ نمبر 2، لنجو سفاری میں نامعلوم مسلح افراد نے ایک قبائلی رہنما کی رہائش گاہ پر فائرنگ کی، جس کے نتیجے میں ان کا بیٹا زخمی ہوگیا۔
پولیس حکام کے مطابق زخمی شخص کو فوری طور پر طبی امداد کے لیے اسپتال منتقل کر دیا گیا، جبکہ سیکیورٹی اہلکاروں نے واقعے کی تحقیقات شروع کر دی ہیں۔