سعودی وزارت داخلہ نے حج 1447 ہجری کے دوران بغیر اجازت نامے کے عازمینِ حج کو لے جانے والے افراد کے خلاف سخت سزاؤں کا اعلان کر دیا ہے، جن میں ایک لاکھ سعودی ریال تک جرمانہ، قید اور ملک بدری شامل ہے۔
سعودی خبر رساں ادارے SPA کے مطابق مکہ مکرمہ کے داخلی راستوں پر تعینات حج سکیورٹی فورسز نے چار غیر ملکیوں اور تین سعودی شہریوں کو گرفتار کیا، جو 13 ایسے عازمین کو حج کے لیے لے جا رہے تھے جن کے پاس سرکاری حج پرمٹ موجود نہیں تھے۔
وزارت داخلہ کے مطابق موسمی انتظامی کمیٹیوں نے خلاف ورزی میں ملوث افراد کے خلاف کارروائی کرتے ہوئے ایک لاکھ سعودی ریال تک جرمانے، قید اور سرعام نام ظاہر کرنے جیسی سزائیں عائد کی ہیں۔
رپورٹ میں کہا گیا ہے کہ بغیر اجازت حج کرنے کی کوشش کرنے والے عازمین کو 20 ہزار سعودی ریال تک جرمانہ کیا جا سکتا ہے۔
حکام نے مزید بتایا کہ خلاف ورزی میں ملوث غیر ملکی سزا مکمل ہونے کے بعد ملک بدر کیے جائیں گے اور ان پر 10 سال تک سعودی عرب میں داخلے پر پابندی ہوگی۔
اس کے علاوہ خلاف ورزی میں استعمال ہونے والی گاڑیوں کی ضبطگی کے لیے بھی عدالتی درخواستیں دائر کر دی گئی ہیں۔
وزارت داخلہ نے شہریوں اور مقیم افراد سے اپیل کی ہے کہ حج قوانین اور ہدایات پر سختی سے عمل کریں تاکہ حج سیزن کو محفوظ اور منظم بنایا جا سکے۔