اسٹاک مارکیٹ میں مندی کا رجحان، انڈیکس میں کمی جبکہ ڈالر معمولی سستا

کراچی( کامرس ڈیسک) پاکستان اسٹاک ایکسچینج میں کاروباری ہفتے کے پہلے روز منفی رجحان دیکھنے میں آیا ہے، جہاں سرمایہ کاروں کے محتاط رویے کے باعث مارکیٹ دباؤ کا شکار رہی۔کاروبار کے دوران ہنڈرڈ انڈیکس میں 191 پوائنٹس کی کمی ریکارڈ کی گئی، جس کے بعد انڈیکس ایک لاکھ ستر ہزار چار سو اسی پوائنٹس کی سطح پر آگیا۔ دورانِ کاروبار انڈیکس ایک لاکھ انہتر ہزار دو سو اڑسٹھ پوائنٹس کی کم ترین سطح تک بھی گیا جبکہ ایک لاکھ اکہتر ہزار تین سو چھ کی بلند ترین سطح بھی دیکھی گئی۔واضح رہے کہ گزشتہ ہفتے کے آخری کاروباری روز کے اختتام پر ہنڈرڈ انڈیکس ایک لاکھ ستر ہزار چھ سو بہتر پوائنٹس پر بند ہوا تھا۔دوسری جانب انٹر بینک مارکیٹ میں امریکی ڈالر کی قدر میں معمولی کمی دیکھی گئی ہے، جہاں ڈالر ایک پیسے کی کمی کے بعد دو سو اٹھتر روپے چوراسی پیسے پر ٹریڈ کر رہا ہے۔