پشاور( بلو چستان خبر)جنوبی وزیرستان کے علاقے اعظم ورسک میں بازار میں بارود سے بھری گاڑی کے ذریعے ہونے والے خودکش دھماکے کے نتیجے میں 14 شہری زخمی ہوگئے، جن میں 4 بچے بھی شامل ہیں۔ڈسٹرکٹ ہیڈکوارٹر اسپتال وانا کی انتظامیہ کے مطابق تمام زخمیوں کو فوری طور پر اسپتال منتقل کیا گیا جہاں انہیں طبی امداد فراہم کی جا رہی ہے۔ زخمیوں میں 8 سالہ بچی بھی شامل ہے اور تمام افراد کا تعلق اسی علاقے سے ہے۔حکام کے مطابق یہ واقعہ 4 مئی کی شام پیش آیا، جس کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ذرائع کے مطابق اس سے قبل بھی اسی نوعیت کے حملوں میں شہری جانی نقصان اٹھا چکے ہیں، جن میں بچوں سمیت متعدد افراد متاثر ہوئے تھے۔سیکیورٹی ماہرین کے مطابق ایسے حملوں کا مقصد علاقے میں خوف و ہراس پھیلانا اور معمولاتِ زندگی کو متاثر کرنا ہوتا ہے، تاہم فورسز کی جانب سے ایسے واقعات کے بعد سیکیورٹی اقدامات مزید سخت کر دیے جاتے ہیں۔
