شہریار میمن کی وفاقی وزراء اور گورنر بلوچستان کے اعزاز میں اعلیٰ سطحی عشائیہ

شہریار میمن کی وفاقی وزراء اور گورنر بلوچستان کے اعزاز میں اعلیٰ سطحی عشائیہ

اسلام آباد: وزیراعظم یوتھ پروگرام (PMYP) میں اوورسیز افیئرز، بزنس اور ٹریڈ لنکیجز کے فوکل پرسن شہریار میمن نے اسلام آباد میں ایک اعلیٰ سطحی عشائیے کا اہتمام کیا، جس میں وفاقی و صوبائی وزراء، گورنر بلوچستان شیخ جعفر خان مندوخیل، ارکانِ پارلیمنٹ، سینئر سول و عسکری حکام اور ممتاز کاروباری شخصیات نے شرکت کی۔

تقریب میں ملک بھر سے تعلق رکھنے والی سیاسی، انتظامی اور کاروباری شخصیات نے پاکستان کی معاشی صورتحال، تجارت، سرمایہ کاری اور اقتصادی مواقع پر تبادلہ خیال کیا۔

شرکاء میں وفاقی وزیر سرمایہ کاری قیصر احمد شیخ، سابق وفاقی وزیر سردار یار محمد رند، رکن قومی اسمبلی خورشید احمد جونیجو، معروف کاروباری شخصیت و رکن پارلیمنٹ ڈاکٹر اختیار بیگ، سینئر سیاستدان سردار لطیف کھوسہ، صوبائی وزیر ماہی گیری بلوچستان برکت علی خان رند، اور صوبائی وزیر ایکسائز و ٹیکسیشن بلوچستان محمد خان لہڑی شامل تھے۔

تقریب کی مشترکہ صدارت وفاقی وزیر سرمایہ کاری قیصر احمد شیخ اور گورنر بلوچستان شیخ جعفر خان مندوخیل نے کی۔

خطاب کرتے ہوئے شہریار میمن نے کہا کہ پاکستان کی معیشت استحکام کی جانب گامزن ہے جبکہ تجارت اور سرمایہ کاری کی سرگرمیوں میں اضافہ ہو رہا ہے۔ انہوں نے کہا کہ پاکستان عالمی سپلائی چین نیٹ ورک کا اہم حصہ بننے کی صلاحیت رکھتا ہے اور اوورسیز پاکستانی غیر ملکی سرمایہ کاری کے فروغ میں کلیدی کردار ادا کر سکتے ہیں۔

وفاقی وزیر سرمایہ کاری قیصر احمد شیخ نے کہا کہ پاکستان غیر ملکی سرمایہ کاروں کے لیے ایک پرکشش ملک ہے اور حکومت سرمایہ کاروں کو مکمل سہولت اور تعاون فراہم کرے گی۔ انہوں نے کہا کہ اسپیشل اکنامک زونز (SEZs) صنعتی منتقلی اور سرمایہ کاری کے لیے اہم مواقع فراہم کر رہے ہیں۔

گورنر بلوچستان شیخ جعفر خان مندوخیل نے کہا کہ عالمی برادری کے ساتھ پاکستان کے تعلقات بہتر ہو رہے ہیں جبکہ گوادر پورٹ وسطی ایشیا اور مشرق وسطیٰ کو ملانے والا ایک اہم تجارتی مرکز بن رہا ہے۔

تقریب سے خطاب کرنے والے مقررین نے پاکستان کے معاشی مستقبل پر اعتماد کا اظہار کرتے ہوئے عالمی معیشت میں ملک کے بڑھتے ہوئے کردار کو سراہا۔