سرفراز بگٹی نے گوادر میں خواتین کے لیے قائم پہلے بازار کا افتتاح کر دیا

کوئٹہ( بلو چستان خبر) وزیراعلیٰ بلوچستان سرفراز بگٹی نے گوادر میں خواتین کے لیے قائم پہلے بازار کا افتتاح کر دیا۔ اس موقع پر انہیں بریفنگ دی گئی کہ اس بازار میں چودہ دکانیں قائم کی گئی ہیں جن سے مقامی خواتین کو براہ راست روزگار کے مواقع حاصل ہوں گے۔افتتاحی تقریب کے بعد وزیراعلیٰ نے بازار کا دورہ کیا اور خواتین دکانداروں سے ملاقات کی۔ اس دوران انہوں نے خواتین کے مسائل اور ان کی تجاویز بھی سنیں۔وزیراعلیٰ بلوچستان نے کہا کہ خواتین کو بااختیار بنانا حکومت کی اولین ترجیحات میں شامل ہے۔ ان کا کہنا تھا کہ ایسے منصوبے نہ صرف خواتین کی معاشی خود مختاری میں مددگار ہیں بلکہ مجموعی معاشی ترقی کے لیے بھی اہم کردار ادا کرتے ہیں۔ انہوں نے کہا کہ گوادر میں قائم یہ بازار خواتین کی صلاحیتوں کے اظہار کا ایک مؤثر ذریعہ ہے۔انہوں نے مزید کہا کہ حکومت خواتین کو کاروبار کے لیے سازگار ماحول فراہم کر رہی ہے اور ایسے منصوبوں کو مزید وسعت دی جائے گی۔ خواتین کی معاشی شمولیت کے بغیر پائیدار ترقی ممکن نہیں۔وزیراعلیٰ نے اس عزم کا اظہار کیا کہ حکومت خواتین کو کاروباری مواقع فراہم کرنے کے لیے ہر ممکن تعاون جاری رکھے گی۔