وفاقی وزیر برائے پیٹرولیم علی پرویز ملک اور بیرک گولڈ کے چیئرمین جان تھارنٹن کے درمیان ایک اہم ملاقات ہوئی، جس میں ریکوڈک کاپر و گولڈ منصوبے کی پیش رفت اور اس کی بروقت تکمیل کے لیے باہمی تعاون کو مزید مستحکم کرنے پر اتفاق کیا گیا۔
اقتصادی ترقی اور اسٹریٹجک اہمیت
ملاقات کے دوران جاری کردہ اعلامیہ کے مطابق، وفاقی وزیر نے ریکوڈک کو پاکستان کی برآمدات اور معدنی شعبے کی ترقی کے لیے ایک سنگِ میل قرار دیا۔ ان کا کہنا تھا کہ ریکوڈک منصوبہ پاکستانی معدنیات کے شعبے کے لیے ایک فلیگ شپ منصوبہ ہے۔اس منصوبے سے ملک میں غیر ملکی سرمایہ کاری بڑھے گی اور روزگار کے ہزاروں نئے مواقع پیدا ہوں گے۔حکومتِ پاکستان ریکوڈک کی کامیابی کے لیے ہر ممکن تعاون جاری رکھے گی۔
بیرک گولڈ کا پختہ عزم
چیئرمین بیرک، جان تھارنٹن نے ریکوڈک منصوبے کی تکمیل کے لیے اپنی کمپنی کے پختہ عزم کا اعادہ کیا۔ انہوں نے حکومتِ پاکستان کی مسلسل معاونت کو سراہتے ہوئے کہا کہ بیرک گولڈ اس عالمی معیار کے منصوبے کو پایہ تکمیل تک پہنچانے کے لیے تمام تر کوششیں بروئے کار لا رہی ہے۔