اسلام آباد: دفتر خارجہ نے جمعہ کو اعلان کیا ہے کہ وزیراعظم شہباز شریف 23 سے 26 مئی تک چین کا تین روزہ سرکاری دورہ کریں گے، جس کا مقصد دونوں ممالک کے درمیان دوطرفہ تعاون اور اسٹریٹجک روابط کو مزید مضبوط بنانا ہے۔
دفتر خارجہ کے ترجمان طاہر اندرابی نے ہفتہ وار میڈیا بریفنگ میں بتایا کہ یہ دورہ چینی حکومت کی دعوت پر کیا جا رہا ہے۔ انہوں نے کہا کہ اس سال پاکستان اور چین کے درمیان سفارتی تعلقات کے 75 سال مکمل ہو رہے ہیں، جس کے باعث یہ دورہ خصوصی اہمیت کا حامل ہے۔
دفتر خارجہ کے مطابق اس دورے کے دوران دونوں ممالک اپنی دیرینہ اسٹریٹجک شراکت داری کا اعادہ کریں گے اور مشترکہ مستقبل کے وژن کو آگے بڑھانے پر بات چیت کریں گے۔
دورے کے دوران وزیراعظم شہباز شریف چینی صدر شی جن پنگ اور وزیراعظم لی چیانگ سے ملاقاتیں کریں گے۔ ان اعلیٰ سطحی ملاقاتوں میں سیاسی، اقتصادی اور اسٹریٹجک تعاون پر تفصیلی گفتگو ہوگی، جبکہ دوطرفہ تعلقات کا جائزہ لینے اور تعاون کے نئے مواقع تلاش کرنے پر بھی غور کیا جائے گا۔
وزیراعظم اپنے دورے کا آغاز ہانگژو (زے جیانگ صوبہ) سے کریں گے، جہاں وہ پاکستان چین بی ٹو بی انویسٹمنٹ کانفرنس کی صدارت کریں گے۔ اس کانفرنس میں آئی ٹی، ٹیلی کمیونیکیشن، انرجی اسٹوریج اور زراعت سمیت اہم شعبوں پر توجہ دی جائے گی۔
بیجنگ میں وزیراعظم پاکستان چینی پیپلز ایسوسی ایشن فار فرینڈشپ ود فارن کنٹریز کی جانب سے منعقدہ تقریب میں بھی شرکت کریں گے جو دونوں ممالک کے سفارتی تعلقات کے 75 سال مکمل ہونے کے موقع پر منعقد کی جا رہی ہے۔
حکام کے مطابق یہ دورہ معاشی تعاون کے فروغ، سرمایہ کاری کے مواقع بڑھانے اور پاکستان چین دوستی کو مزید مستحکم کرنے میں اہم کردار ادا کرے گا۔