وزیرِ اعظم محمد شہباز شریف نے بلوچستان کے ضلع بارکھان کے علاقے نوشام میں دہشت گردوں کے خلاف کامیاب آپریشن اور "فتنہ الہند" کے سات دہشت گردوں کو جہنم واصل کرنے پر سیکیورٹی فورسز کے افسران و اہلکاروں کی پیشہ ورانہ مہارت اور عزم کو سراہا ہے۔
شہداء کو خراجِ تحسین
وزیرِ اعظم نے آپریشن کے دوران ارضِ وطن کی حفاظت کرتے ہوئے جامِ شہادت نوش کرنے والے پانچ بہادر سپوتوں کو زبردست خراجِ تحسین پیش کیا ہے۔ شہداء میں میجر توصیف احمد بھٹی، نائیک فدا حسین، سپاہی ذاکر حسین، سپاہی سہیل احمد اور سپاہی محمد ایاز شامل ہیں۔
وزیرِ اعظم نے شہداء کے درجات کی بلندی کے لیے دعا کی اور ان کے لواحقین سے دلی ہمدردی کا اظہار کرتے ہوئے انہیں خراجِ تحسین پیش کیا۔ انہوں نے کہا کہ قوم اپنے ان بہادر شہداء کی عظیم قربانیوں کو کبھی فراموش نہیں کرے گی۔
عہدِ وفا کی لازوال مثال
وزیرِ اعظم شہباز شریف نے شہداء کی قربانیوں پر اظہارِ خیال کرتے ہوئے کہا کہ وطن کے ان عظیم سپوتوں نے دہشت گردوں سے ملک کی حفاظت کے دوران عہدِ وفا کی عظیم مثال قائم کی ہے۔ سیکیورٹی فورسز کے افسران و جوان ارضِ وطن کی حفاظت کے لیے دن رات مصروفِ عمل ہیں اور وطنِ عزیز کی حفاظت کے غیر متزلزل عزم میں، مجھ سمیت پوری قوم اپنی بہادر سیکیورٹی فورسز کے شانہ بشانہ کھڑی ہے۔