پاکستان نے امریکی حکام کے کنٹرول میں موجود جہازوں پر سوار پاکستانی اور ایرانی ملاحوں کی محفوظ وطن واپسی کے لیے سنگاپور سے تعاون طلب کرلیا ہے۔
نائب وزیراعظم اور وزیر خارجہ اسحاق ڈار نے کہا ہے کہ اسلام آباد عملے کی واپسی کے لیے متحرک ہے اور اس سلسلے میں سنگاپور کے وزیر خارجہ ویوین بالاکرشنن سے رابطہ کیا گیا ہے تاکہ جہازوں کے سنگاپوری حدود کے قریب پہنچنے پر سہولت فراہم کی جاسکے۔
سوشل میڈیا پلیٹ فارم ایکس پر جاری بیان میں اسحاق ڈار نے کہا کہ وہ اس معاملے پر ایرانی وزیر خارجہ عباس عراقچی سے بھی مسلسل رابطے میں ہیں۔ انہوں نے مزید کہا کہ پاکستان ایرانی شہریوں کی پاکستانی سرزمین کے ذریعے ایران واپسی میں بھی سہولت فراہم کرنے کے لیے تیار ہے۔
وزیر خارجہ کے مطابق زیرِ حراست جہازوں میں مجموعی طور پر 11 پاکستانی اور 20 ایرانی ملاح موجود ہیں۔
پاکستان کی سفارتی کوششیں ایسے وقت میں سامنے آئی ہیں جب امریکی کنٹرول میں موجود جہازوں پر پھنسے عملے کی فلاح و بہبود اور محفوظ واپسی کے حوالے سے تشویش میں اضافہ ہورہا ہے۔