پاکستان نے یو اے ای کو مزید ایک ارب ڈالر واپس کر دیے، مجموعی ادائیگی مکمل

کراچی ( کامرس ڈیسک) اسٹیٹ بینک کے مطابق پاکستان نے متحدہ عرب امارات کو ڈپازٹس کی مد میں مزید ایک ارب ڈالر واپس کر دیے ہیں۔تفصیلات کے مطابق ابوظہبی فنڈ برائے ترقی کو ایک ارب ڈالر کی ادائیگی کی گئی، جس کے بعد گزشتہ ہفتے کی 2.45 ارب ڈالر ادائیگی سمیت یو اے ای کو مجموعی طور پر 3.45 ارب ڈالر کی واپسی مکمل ہو گئی ہے۔اسٹیٹ بینک کا کہنا ہے کہ بروقت ادائیگی مالی نظم و ضبط اور ذمہ دارانہ معاشی پالیسیوں کے عزم کی عکاسی کرتی ہے۔ادارے کے مطابق ملکی زرمبادلہ کے ذخائر میں بھی اضافہ ریکارڈ کیا گیا ہے، جس میں اسٹیٹ بینک اور کمرشل بینکوں دونوں کے ذخائر میں بہتری دیکھی گئی ہے۔ مجموعی ذخائر میں گزشتہ ہفتے کے دوران اضافہ ہوا، جبکہ سعودی عرب کی جانب سے ایک ارب ڈالر کی آمد بھی ریکارڈ کی گئی۔اسٹیٹ بینک نے مزید بتایا کہ آئندہ ہفتے کے اعداد و شمار میں یو اے ای کی حالیہ ادائیگی بھی شامل کی جائے گی۔