ہمارے کارکن محض سیاسی ہی نہیں نظریاتی سپاہی اور دینی مشن کا امین ہوتا ہے: مولانا عبدالواسع

قلعہ عبداللہ ( بلو چستان خبر) جمعیت علماء اسلام کے زیر اہتمام تربیتی کنونشن کا انعقاد کیا گیا جس میں مرکزی اور صوبائی قیادت نے شرکت کی۔کنونشن سے بلوچستان کے امیر مولانا عبدالواسع، خیبر پختونخوا کے صوبائی امیر و سینیٹر مولانا عطاالرحمن، مرکزی ناظم مالیات مولانا صلاح الدین ایوبی، صوبائی نائب امیر مفتی فضل غفور اور سینیٹر حاجی عبدالشکور نے خطاب کیا۔مقررین نے کہا کہ جمعیت علماء اسلام کا کارکن محض سیاسی کارکن نہیں بلکہ ایک نظریاتی سپاہی اور دینی مشن کا امین ہوتا ہے، جس کی ذمہ داریاں وسیع اور ہمہ جہت ہوتی ہیں۔انہوں نے کہا کہ مدارس دینیہ کردار سازی، اخلاقی تربیت اور روحانی نشوونما کے مراکز ہیں جہاں علم کے ساتھ اخلاق اور خدمت کو بھی فروغ دیا جاتا ہے۔مولانا عبدالواسع نے کہا کہ جمعیت نے ہمیشہ اصولی سیاست، آئین کی پاسداری اور جمہوری تسلسل کو اپنی سیاست کا محور بنایا ہے، جبکہ موجودہ حالات میں کارکنان کو نظم و ضبط، صبر اور اعلیٰ اخلاق اپنانا ہوگا۔سینیٹر مولانا عطاالرحمن نے کہا کہ جمعیت کی سیاست دلیل، حکمت اور شائستگی پر مبنی ہے اور اسے ہر حال میں برقرار رکھنا ضروری ہے۔