اسرائیل اور لبنان کے درمیان واشنگٹن میں مذاکرات کا نیا دور متوقع، جنگ بندی میں توسیع زیر غور

واشنگٹن( مانیٹرنگ ڈیسک) اسرائیل اور لبنان کے درمیان آج واشنگٹن میں مذاکرات کا ایک اور دور متوقع ہے، جس میں لبنانی حکام جنگ بندی میں ایک ماہ کی توسیع کی درخواست پیش کریں گے۔خبر رساں ادارے اے ایف پی کے مطابق موجودہ جنگ بندی چند روز میں ختم ہونے والی ہے، جس کے باعث خطے میں دوبارہ کشیدگی کے خدشات بڑھ گئے ہیں۔الجزیرہ کی رپورٹ میں ایک نامعلوم حزب اللہ عہدیدار کے حوالے سے بتایا گیا ہے کہ تنظیم جاری مذاکراتی عمل کے تحت امریکا کی ثالثی میں بالواسطہ مذاکرات قبول کرنے پر آمادہ ہو سکتی ہے۔دوسری جانب اسرائیلی وزیر خارجہ گدعون ساعر نے کہا ہے کہ اسرائیل اور لبنان کے درمیان کوئی سنجیدہ اختلافات موجود نہیں، تاہم انہوں نے حزب اللہ کو امن اور معمول کے تعلقات کی راہ میں رکاوٹ قرار دیا ہے۔رپورٹس کے مطابق عارضی جنگ بندی کے باوجود اسرائیلی افواج کی جانب سے لبنان میں کارروائیاں جاری ہیں، جن میں جانی نقصان بھی ہوا ہے۔ ان حملوں میں ایک لبنانی صحافی امل خلیل کی ہلاکت کی بھی اطلاعات ہیں، جبکہ بعض علاقوں میں گھروں کی مسماری کا بھی ذکر کیا گیا ہے۔لبنانی حکام کے مطابق مارچ کے آغاز سے جاری کشیدگی کے دوران اب تک کم از کم دو ہزار چار سو چون افراد ہلاک ہو چکے ہیں، جس سے خطے میں صورتحال بدستور کشیدہ بنی ہوئی ہے۔