قومی فخر: نمل یونیورسٹی میں قائداعظم کی 150ویں سالگرہ کے موقع پر شاندار بین الاقوامی سیمینار
اسلام آباد: نیشنل یونیورسٹی آف ماڈرن لینگویجز (نمل) اسلام آباد میں بانیٔ پاکستان قائداعظم محمد علی جناح کی 150ویں سالگرہ کے موقع پر ایک روزہ بین الاقوامی سیمینار کا انعقاد کیا گیا۔
تقریب کی صدارت ریکٹر نمل میجر جنرل شاہد محمود کیانی (ر) نے کی، جبکہ سیمینار میں اساتذہ، ماہرین تعلیم، محققین اور طلبہ کی بڑی تعداد نے شرکت کی۔ مقررین نے قائداعظم کی زندگی، آئینی جدوجہد اور قیامِ پاکستان کے لیے ان کی تاریخی خدمات پر تفصیلی روشنی ڈالی۔
نوجوان نسل کو قائداعظم کے وژن سے جوڑنے پر زور
اس موقع پر خطاب کرتے ہوئے ریکٹر نمل میجر جنرل شاہد محمود کیانی (ر) نے کہا کہ اس تقریب کا مقصد نوجوان نسل کو قائداعظم کی سیاسی جدوجہد، قربانیوں اور قومی نظریے سے روشناس کرانا ہے تاکہ وہ مستقبل میں ملک کی تعمیر و ترقی میں مثبت کردار ادا کر سکیں۔
قومی ماہرین تعلیم اور اسکالرز کا خطاب
سیمینار سے خطاب کرتے ہوئے چیئرمین قائداعظم فاؤنڈیشن ڈاکٹر آصف ریاض نے کہا کہ قائداعظم کی نظم و ضبط پر مبنی زندگی اور سیاسی بصیرت آج کی نوجوان نسل کے لیے مشعلِ راہ ہے۔
انجمن فیض الاسلام کے صدر پروفیسر ڈاکٹر ریاض احمد نے نمل کے اس اقدام کو سراہتے ہوئے کہا کہ تعلیمی اداروں میں اس نوعیت کی تقریبات کا انعقاد پاکستان تحریک کی حقیقی روح کو زندہ رکھنے کے لیے انتہائی ضروری ہے۔
سیمینار کے اختتام پر شرکاء خصوصاً طلبہ نے قائداعظم محمد علی جناح کے وژن کے مطابق قومی ترقی اور مثبت کردار ادا کرنے کے عزم کا اظہار کیا۔