اسلام آباد ( کامرس ڈیسک) نائب وزیراعظم اسحاق ڈار کی زیر صدارت قومی اقتصادی کونسل کا اجلاس منعقد ہوا جس میں ملک بھر میں ترقیاتی ترجیحات اور اہم منصوبوں کی منظوری دی گئی۔اجلاس کے دوران حکومت نے بنیادی ڈھانچے کی بہتری، اقتصادی استحکام اور علاقائی ترقی کو اپنی ترجیحات قرار دیا۔ مختلف اہم منصوبوں پر پیش رفت کا جائزہ بھی لیا گیا۔اجلاس میں ریلوے کے بڑے منصوبے، ڈرائی پورٹس کی بہتری، کوئلے کے ذریعے توانائی کے منصوبے، آبپاشی نظام کی اصلاح اور سیلاب سے متاثرہ علاقوں کی بحالی جیسے امور پر تفصیلی غور کیا گیا۔اس کے علاوہ صحت کے شعبے اور بڑے ڈیم منصوبوں سے متعلق انتظامی اقدامات پر بھی تبادلہ خیال کیا گیا تاکہ ملک میں ترقیاتی عمل کو مزید مؤثر بنایا جا سکے۔
