نیب بلوچستان کا کوئٹہ کالج میں کرپشن کے خلاف آگاہی سیمینار
کوئٹہ: قومی احتساب بیورو (نیب) بلوچستان نے تعمیرِ نو پبلک کالج کوئٹہ میں “نیب کے فرائض اور کرپشن کے خاتمے میں طلبہ کا کردار” کے عنوان سے آگاہی سیمینار کا انعقاد کیا۔
سیمینار کا مقصد نوجوانوں میں کرپشن کے نقصانات، شفافیت، دیانتداری اور احتساب کی اہمیت سے متعلق شعور اجاگر کرنا تھا۔
تقریب سے خطاب کرتے ہوئے مقررین نے کہا کہ کرپشن کے خاتمے اور ایک شفاف معاشرے کے قیام میں طلبہ اور تعلیمی اداروں کا کردار انتہائی اہم ہے۔
انہوں نے نوجوانوں پر زور دیا کہ وہ احتساب اور دیانتداری کے فروغ میں فعال کردار ادا کریں اور معاشرے میں مثبت تبدیلی لانے کے لیے اپنی ذمہ داریاں نبھائیں۔
شرکاء نے نیب بلوچستان کی آگاہی مہمات کو سراہتے ہوئے مستقبل میں بھی انسدادِ کرپشن اقدامات میں تعاون کے عزم کا اظہار کیا۔
سیمینار کے اختتام پر شیلڈ تقسیم کرنے کی تقریب منعقد کی گئی جبکہ احتساب اور دیانتداری کا پیغام عام کرنے کے لیے آگاہی واک بھی کی گئی، جس میں نیب حکام، کالج انتظامیہ، اساتذہ اور طلبہ کی بڑی تعداد نے شرکت کی۔