لاہور( کامرس ڈیسک)قومی توانائی ریگولیٹری اتھارٹی (نیپرا) نے سولر لائسنسنگ سے متعلق پھیلنے والی غلط معلومات کی تردید کرتے ہوئے صورتحال واضح کر دی ہے۔نیپرا حکام کے مطابق تمام آن گرڈ سولر نیٹ میٹرنگ صارفین کے لیے متعلقہ منظوری کا عمل ضروری ہے، تاہم 25 کلو واٹ سے کم صلاحیت والے کنکشنز کی منظوری پہلے سے ہی تقسیم کار کمپنیوں کے دائرہ اختیار میں ہے۔حکام نے واضح کیا کہ آف گرڈ سولر سسٹمز کا نیپرا کی منظوری کے نظام سے کوئی تعلق نہیں۔ اس سے قبل 25 کلو واٹ سے زائد کنکشنز کی منظوری نیپرا کے ذمے تھی۔بیان میں مزید کہا گیا کہ آن گرڈ سولر کنکشن کے لیے صرف ایک بار فی کلو واٹ فیس وصول کی جاتی ہے اور سولر صارفین پر کوئی نیا ٹیکس عائد نہیں کیا گیا۔
