مکہ مکرمہ: وفاقی وزیر برائے مذہبی امور و بین المذاہب ہم آہنگی سردار محمد یوسف سعودی عرب پہنچ گئے، جہاں انہوں نے پاکستانی حجاج کرام کی سہولیات اور حج انتظامات کا جائزہ لینے کے لیے عزیزیہ میں قائم پاکستان حج مشن کے مرکزی دفتر کا دورہ کیا۔ اس موقع پر سیکریٹری مذہبی امور ابرار احمد مرزا بھی ان کے ہمراہ تھے۔
وفاقی وزیر کو ڈی جی حج عبدالوھاب سومرو، چیف کوآرڈینیٹر مکہ ڈاکٹر مرزا علی محسود، کوآرڈینیٹر مکہ ذوالفقار خان اور ڈائریکٹر مکہ عارف راؤ نے حج انتظامات پر تفصیلی بریفنگ دی، جبکہ ڈائریکٹر حج مدینہ زاہد سہیل اور کوآرڈینیٹر مدینہ کاشف حسین نے زوم کے ذریعے اجلاس میں شرکت کی۔
اس موقع پر سردار محمد یوسف نے کہا کہ وزیراعظم شہباز شریف کی ہدایات کے مطابق پاکستانی حجاج کرام کو ہر ممکن سہولت فراہم کی جا رہی ہے۔ انہوں نے کہا کہ اللہ کے مہمانوں کی خدمت ایک مقدس ذمہ داری ہے اور اس حوالے سے کسی قسم کی غفلت برداشت نہیں کی جائے گی۔
وفاقی وزیر نے حج انتظامات پر سعودی حکومت کے اقدامات کو سراہتے ہوئے پاکستانی حج مشن کو ہدایت کی کہ شکایات کے ازالے کے نظام کو مزید مؤثر بنایا جائے تاکہ حجاج کو فوری ریلیف فراہم کیا جا سکے۔
سیکریٹری مذہبی امور ابرار احمد مرزا نے کہا کہ آئندہ برسوں میں بھی اعلیٰ معیار کے حج انتظامات کو برقرار رکھنے کے لیے منصوبہ بندی کو مزید بہتر بنایا جا رہا ہے۔
ڈی جی حج عبدالوھاب سومرو نے بریفنگ میں بتایا کہ پاکستان حج مشن اس وقت تقریباً ایک لاکھ 19 ہزار سرکاری حجاج کرام کی میزبانی کر رہا ہے۔ حجاج کی رہائش کے لیے مکہ مکرمہ کے مختلف علاقوں عزیزیہ، حی النسیم اور بطحاء قریش میں 273 رہائشی عمارتیں حاصل کی گئی ہیں۔