این ایل سی کے ٹرانزٹ معاہدے کے تحت وسطی ایشیائی تجارت میں اہم پیش رفت، پہلی کھیپ پاکستان پہنچ گئی

اسلام آباد( بلو چستان خبر) ٹرانزٹ معاہدے کے تحت این ایل سی کی پارٹنر کمپنی کی پہلی تجارتی کھیپ کرغزستان سے چین کے راستے پاکستان پہنچ گئی ہے۔نیشنل لاجسٹک سیل کی مؤثر حکمت عملی اور علاقائی تجارتی روابط کے نتیجے میں اس پیش رفت کو ایک اہم سنگ میل قرار دیا جا رہا ہے۔این ایل سی کی کوششوں کے باعث خطے کے متعدد ممالک نے خنجراب پاس اور سوست پورٹ کو ایک قابل اعتماد تجارتی راہداری کے طور پر استعمال کرنا شروع کر دیا ہے۔نئے روٹ کے تحت کرغزستان، تاجکستان، ترکمانستان، قازقستان اور ازبکستان کو کراچی بندرگاہ تک براہ راست رسائی حاصل ہو گی، جس سے وسطی ایشیائی ممالک کے لیے پاکستان ایک تیز، محفوظ اور قابل اعتماد تجارتی راستے کے طور پر ابھر رہا ہے۔رپورٹس کے مطابق دو ہزار چوبیس سے این ایل سی کراچی سے کرغزستان کے مختلف شہروں تک جدید ٹی آئی آر نظام کے تحت کامیاب ترسیلات کر رہا ہے۔ماہرین کے مطابق اس منصوبے کے تحت خطے میں تجارتی روابط میں اضافہ ہوا ہے اور سوست ڈرائی پورٹ کی سال بھر فعالیت نے چین اور وسطی ایشیائی ممالک کے ساتھ تجارت میں تسلسل اور استحکام کو مزید مضبوط کیا ہے۔