اسلام آباد ہائی کورٹ میں ریڈ زون بندش کے باعث عدالتی امور متاثر، سینکڑوں کیسز التوا کا شکار

اسلام آباد( بلو چستان خبر) ایران امریکا مذاکرات سے متعلق سیکیورٹی صورتحال کے باعث اسلام آباد ہائی کورٹ میں رواں ہفتے کوئی سماعت نہیں ہو سکی۔ایکسپریس نیوز کے مطابق ریڈ زون کی مسلسل بندش کے باعث ہائی کورٹ کا جوڈیشل ورک متاثر ہوا اور پیر سے جمعرات تک ایک بھی کیس کی سماعت نہیں ہو سکی، جس کے نتیجے میں سینکڑوں مقدمات التوا کا شکار ہو گئے۔تفصیلات کے مطابق عدالت میں اہم مقدمات کی سماعت بھی متاثر ہوئی، جن میں ایک سو نوے ملین پاؤنڈ کیس میں سزا معطلی کی درخواستیں بھی شامل تھیں، جو بائیس اپریل کو مقرر تھیں تاہم کاز لسٹ منسوخ کر دی گئی۔اسی طرح اسلام آباد میں درختوں کی کٹائی سے متعلق کیس کی سماعت بھی نہ ہو سکی جو آج مقرر تھی۔مزید بتایا گیا ہے کہ کفایت شعاری مہم کے تحت پہلے ہی جمعہ کے روز عدالتی امور نہیں ہوتے، جس سے صورتحال مزید بگڑ رہی ہے۔دوسری جانب آئندہ ہفتے ججز کے تبادلے کے امکانات کے باعث کیسز کے التوا میں مزید اضافہ متوقع ہے، جبکہ وکلا اور سائلین کو اپنے کیسز دوبارہ مقرر کروانے میں شدید مشکلات کا سامنا ہے۔