تہران( مانیٹرنگ ڈیسک) ایران کے وزیر خارجہ عباس عراقچی نے امریکا پر جنگی اخراجات کے حوالے سے غلط معلومات فراہم کرنے کا الزام عائد کیا ہے۔سماجی رابطے کی ویب سائٹ ایکس پر جاری بیان میں عباس عراقچی نے کہا کہ امریکی محکمہ دفاع پینٹاگون جنگ کی اصل لاگت کو کم ظاہر کر رہا ہے۔ان کے مطابق 28 فروری کو شروع ہونے والی جنگ، جو امریکی صدر ڈونلڈ ٹرمپ اور اسرائیلی وزیر اعظم بنیامین نیتن یاہو کی پالیسیوں کے تحت لڑی گئی، اس کی اصل لاگت اب تک تقریباً 100 ارب ڈالر تک پہنچ چکی ہے، جو سرکاری دعوؤں سے چار گنا زیادہ ہے۔ایرانی وزیر خارجہ نے مزید دعویٰ کیا کہ جنگ کے بالواسطہ اخراجات اس سے بھی زیادہ ہیں اور اس کا بوجھ براہ راست امریکی عوام پر پڑ رہا ہے، جبکہ ہر گھرانے پر ماہانہ تقریباً 500 ڈالر اضافی اخراجات کا دباؤ بڑھ رہا ہے۔انہوں نے اسرائیل کو ترجیح دینے کی پالیسی پر تنقید کرتے ہوئے کہا کہ ایسی حکمت عملی ہمیشہ امریکا کو نقصان پہنچاتی ہے۔ماہرین کے مطابق ایران اور امریکا کے درمیان اس نوعیت کے بیانات خطے میں کشیدگی کو مزید بڑھا سکتے ہیں اور عالمی سطح پر نئی بحث کو جنم دے سکتے ہیں۔
