خضدار: بلوچستان سسٹین ایبل ڈویلپمنٹ انٹرنیشنل (BSDI) فیز ون کے تحت نال اور گردونواح میں ترقیاتی منصوبوں پر تیزی سے کام جاری ہے۔ ڈپٹی کمشنر خضدار کی خصوصی نگرانی میں جاری ان منصوبوں کو عوامی حلقوں کی جانب سے بھرپور سراہا جا رہا ہے۔
علاقے کی تاریخ میں پہلی بار اہم ترقیاتی منصوبوں کی براہِ راست نگرانی ڈپٹی کمشنر آفس کی جانب سے کی جا رہی ہے، جس کے باعث نہ صرف شفافیت میں اضافہ ہوا ہے بلکہ تعمیراتی معیار اور رفتار بھی بہتر ہوئی ہے۔
ترقیاتی منصوبوں میں مختلف اہم شعبوں پر توجہ دی جا رہی ہے، جن میں سڑکوں کی تعمیر، صاف پانی کی فراہمی، تعلیم، صحت اور بنیادی شہری سہولیات شامل ہیں۔
کلی دال رحمت میں بلیک ٹاپ روڈ کی تعمیر جاری ہے تاکہ علاقے میں آمدورفت بہتر بنائی جا سکے، جبکہ بیزن پور اور ملحقہ علاقوں میں پینے کے صاف پانی کی فراہمی کے منصوبوں پر بھی کام جاری ہے۔
حکام کے مطابق تکنیکی ٹیمیں اور متعلقہ محکموں کے افسران مسلسل سائٹس کا دورہ کر رہے ہیں تاکہ منصوبے مقررہ مدت میں مکمل کیے جا سکیں۔
مقامی سماجی و سیاسی حلقوں نے ڈپٹی کمشنر خضدار کی فعال حکمرانی کو سراہتے ہوئے کہا کہ انتظامیہ کی خصوصی دلچسپی سے طویل عرصے سے تعطل کا شکار ترقیاتی کام دوبارہ فعال ہوئے ہیں۔
علاقہ مکینوں نے امید ظاہر کی کہ ان منصوبوں کی بروقت تکمیل سے عوام کو دیرینہ مسائل سے نجات ملے گی اور علاقے میں معاشی و سماجی بہتری آئے گی۔