آئی بی آئی بیجنگ یونائیٹڈ ٹیکنالوجی کے بانی، صدر اور کنٹرولنگ شیئر ہولڈر چیان شیاؤجن کی قیادت میں 11 رکنی اعلیٰ سطحی چینی کاروباری وفد نے وزیراعظم ہاؤس میں وزیراعظم محمد شہباز شریف سے ملاقات کی، جس میں دوطرفہ تجارت اور ڈیجیٹل معیشت سے متعلق تعاون پر تبادلہ خیال کیا گیا۔
پاک چین اقتصادی تعلقات کو مزید مضبوط بنانے پر زور
وزیراعظم شہباز شریف نے وفد کا پاکستان آمد پر خیرمقدم کرتے ہوئے کہا کہ پاکستان اور چین کے تعلقات تاریخی، گہرے اور مضبوط بنیادوں پر قائم ہیں۔ انہوں نے صدر شی جن پنگ کی قیادت میں چین کی شاندار معاشی ترقی کو سراہا۔
وزیراعظم نے کہا کہ وہ رواں ماہ چین کے اپنے آئندہ سرکاری دورے کے منتظر ہیں، جس سے دونوں ممالک کے درمیان تعاون کو مزید فروغ ملے گا۔
انہوں نے آئی بی آئی گروپ کے پاکستان میں ڈیجیٹل اکانومی ہیڈکوارٹر قائم کرنے کے فیصلے کو سراہتے ہوئے اسے پاک چین کاروباری تعاون کے فروغ کے لیے اہم پیش رفت قرار دیا۔
وزیراعظم نے کہا، “یہ خوش آئند امر ہے کہ آئی بی آئی ڈیجیٹل پاکستان اور چین کے درمیان اقتصادی تعاون، سرمایہ کاری اور صنعتی اشتراک کو مزید فروغ دے گا۔”
پاکستانی ایس ایم ایز کے لیے نئے مواقع
آئی بی آئی گروپ کے سربراہ چیان شیاؤجن نے پاکستان کی معاشی صلاحیتوں پر اعتماد کا اظہار کرتے ہوئے کہا کہ کمپنی پاکستان میں ڈیجیٹل اصلاحات کے فروغ کے لیے مکمل طور پر پُرعزم ہے۔
انہوں نے کہا کہ پاکستان میں ڈیجیٹل اکانومی ہیڈکوارٹر کے قیام سے مقامی چھوٹے اور درمیانے درجے کے کاروباروں (SMEs) کو چینی مارکیٹ تک براہِ راست رسائی حاصل ہوگی، جس سے نئی معاشی سرگرمیوں اور سرمایہ کاری کے مواقع پیدا ہوں گے۔
یہ اعلیٰ سطحی ملاقات وزیراعظم شہباز شریف کے ستمبر 2025 میں بیجنگ کے دورے کے دوران منعقدہ پاکستان-چین بی ٹو بی انویسٹمنٹ کانفرنس کے تسلسل کا حصہ قرار دی جا رہی ہے۔
اہم وفاقی وزراء اور حکام کی شرکت
ملاقات میں متعدد وفاقی وزراء اور اعلیٰ حکام نے بھی شرکت کی، جن میں وفاقی وزیر سرمایہ کاری علیم خان، وفاقی وزیر تجارت جام کمال خان، وفاقی وزیر آئی ٹی و ٹیلی کام شزا فاطمہ خواجہ، وفاقی وزیر پیٹرولیم علی پرویز ملک، وزیراعظم کے معاون خصوصی ہارون اختر اور طارق فاطمی سمیت دیگر اعلیٰ سرکاری حکام شامل تھے۔