گوادر: گوادر ڈویلپمنٹ اتھارٹی (جی ڈی اے) نے گوادر ماسٹر پلان (2025-35) کے دوسرے مرحلے کے تحت 280 ارب روپے مالیت کے میگا ترقیاتی منصوبوں کو مرحلہ وار شروع کرنے کا فیصلہ کیا ہے۔ اس منصوبے کا بنیادی مقصد گوادر کو ایک جدید، اسمارٹ اور ماحول دوست عالمی معاشی مرکز میں تبدیل کرنا ہے۔
سمارٹ پورٹ سٹی کی تعمیر
ڈائریکٹر جنرل جی ڈی اے معین الرحمن خان کی صدارت میں منعقدہ اجلاس میں اگلے 10 سالہ ترقیاتی پروگرام کے تحت مختلف منصوبوں کو حتمی شکل دی گئی۔ اجلاس کو بتایا گیا کہ ان منصوبوں کے ذریعے گوادر کو بین الاقوامی سطح پر ایک مسابقتی تجارتی شہر بنایا جائے گا۔
10 سالہ ترقیاتی پروگرام اور پی سی ون
ڈپٹی ڈائریکٹر ٹاؤن پلاننگ عبدالرزاق نے بریفنگ دیتے ہوئے کہا کہ جی ڈی اے ایک جامع 10 سالہ ترقیاتی پروگرام تیار کر رہی ہے جسے منظوری کے لیے پہلے صوبائی اور پھر وفاقی حکومت کو ارسال کیا جائے گا۔
اس پروگرام کو مالی سال 27-2026 کے بجٹ میں شامل کیے جانے کا قوی امکان ہے۔
بنیادی مقصد: گوادر ماسٹر پلان کے مکمل اور موثر نفاذ کو یقینی بنانا اور جاری ترقیاتی سرگرمیوں کو ایک مربوط حکمتِ عملی کے تحت آگے بڑھانا ہے۔