کوئٹہ: گورنر بلوچستان جعفر خان مندوخیل نے صوبے کے اخبارات اور جرائد کو درپیش مسائل کے پائیدار حل کے لیے ہر ممکن تعاون کی یقین دہانی کراتے ہوئے کہا ہے کہ پرنٹ میڈیا بلوچستان میں ذمہ دار صحافت، مقامی زبانوں کے فروغ اور نوجوان نسل میں حب الوطنی کے جذبے کو مضبوط بنانے میں اہم کردار ادا کر رہا ہے۔
یہ بات انہوں نے بلوچستان پرنٹ میڈیا کے چیئرمین سید انور شاہ کی سربراہی میں آنے والے پرنٹ میڈیا ایڈیٹرز کے وفد سے ملاقات کے دوران کہی۔
گورنر بلوچستان نے کہا کہ جدید ٹیکنالوجی کے تیز رفتار فروغ کے باوجود پرنٹ میڈیا حکومت اور عوام کے درمیان ایک مؤثر رابطے کا ذریعہ ہے، خصوصاً بلوچستان جیسے وسیع جغرافیائی اور منفرد سماجی حالات رکھنے والے صوبے میں اس کی اہمیت برقرار ہے۔
انہوں نے کہا کہ ڈیجیٹل پلیٹ فارمز اور مصنوعی ذہانت (AI) کے بڑھتے ہوئے استعمال نے روایتی میڈیا کو نئے چیلنجز سے دوچار کیا ہے، جس کے باعث پرنٹ میڈیا کو جدید تقاضوں سے ہم آہنگ کرنے اور تکنیکی اپ گریڈیشن کی ضرورت ہے۔
گورنر مندوخیل نے کہا:
"بلوچستان کے اخبارات اور جرائد صرف خبروں کا ذریعہ نہیں بلکہ ہماری قومی تاریخ، زبان اور ادب کے محافظ بھی ہیں۔"
انہوں نے صحافت کو ایک اہم صنعت قرار دیتے ہوئے کہا کہ یہ شعبہ ہزاروں افراد کو روزگار فراہم کرتا ہے۔ انہوں نے پرنٹ اور الیکٹرانک میڈیا سے وابستہ صحافیوں کی پیشہ ورانہ خدمات، دیانتداری اور عزم کو سراہا۔
گورنر بلوچستان نے صحافیوں کے حقوق کے تحفظ، آزادیٔ اظہار کی حمایت اور میڈیا اداروں کو درپیش مسائل کے حل کے لیے حکومتی عزم کا اعادہ بھی کیا۔
ملاقات کے دوران وفد نے میڈیا پالیسی، مالی مشکلات اور دیگر انتظامی امور سے متعلق مسائل سے آگاہ کیا، جس پر گورنر جعفر خان مندوخیل نے مکمل تعاون اور مثبت کردار ادا کرنے کی یقین دہانی کرائی۔