غزہ میں انسانی المیہ شدت اختیار کر گیا، ہزاروں شہادتیں اور زخمی

غزہ ( مانیٹرنگ ڈیسک)غزہ میں جاری صورتحال انتہائی سنگین رخ اختیار کر گئی ہے جہاں تازہ ترین اعداد و شمار کے مطابق اسرائیلی حملوں کے نتیجے میں بڑی تعداد میں فلسطینی شہید اور زخمی ہو چکے ہیں۔7 اکتوبر 2023 سے 22 اپریل 2026 تک کے اعداد و شمار کے مطابق غزہ میں 72 ہزار سے زائد فلسطینی شہید جبکہ ایک لاکھ 72 ہزار سے زیادہ افراد زخمی ہوئے ہیں۔ رپورٹ کے مطابق بہت سے افراد اب بھی ملبے تلے دبے ہوئے ہیں۔اعداد و شمار کے مطابق آبادی کا ایک بڑا حصہ براہ راست متاثر ہوا ہے، جبکہ زخمی ہونے والوں میں بڑی تعداد ایسے افراد کی ہے جنہیں طویل المدتی معذوری کا سامنا ہے۔مزید بتایا گیا ہے کہ 10 اکتوبر 2025 کو ہونے والی جنگ بندی کے بعد بھی تشدد مکمل طور پر نہیں رکا اور اس کے بعد بھی سینکڑوں افراد شہید اور ہزاروں زخمی ہوئے۔غزہ کے مختلف علاقوں میں مسلسل بمباری اور زمینی کارروائیوں کے باعث وسیع پیمانے پر تباہی رپورٹ کی جا رہی ہے، جبکہ انسانی بحران مزید شدت اختیار کرتا جا رہا ہے۔