چاغی میں ایف سی کی کارروائی: 25 کلو افیون، اسلحہ برآمد، ایک مشتبہ شخص گرفتار
چاغی — ایف سی بلوچستان (ساؤتھ) دالبندین رائفلز نے چاغی بازار میں انٹیلی جنس بیسڈ آپریشن کرتے ہوئے ایک کامیاب کارروائی کے دوران منشیات اور اسلحہ برآمد کر لیا۔
ایف سی بلوچستان (ساؤتھ) کے مطابق کارروائی خفیہ اطلاع پر کی گئی، جس کے نتیجے میں محمد اسحاق نامی ایک مشتبہ شخص کو گرفتار کیا گیا۔ کارروائی کے دوران سکیورٹی اہلکاروں نے 25 کلوگرام افیون، دو 9 ایم ایم پستول اور بڑی مقدار میں گولیاں برآمد کیں۔
برآمد شدہ منشیات اور اسلحہ مزید قانونی کارروائی اور تفتیش کے لیے پولیس کے حوالے کر دیا گیا ہے۔
ایف سی بلوچستان (ساؤتھ) نے کہا ہے کہ منشیات کی اسمگلنگ اور جرائم پیشہ سرگرمیوں کے خلاف زیرو ٹالرنس پالیسی کے تحت کارروائیاں جاری رہیں گی، اور بلوچستان کو منشیات سے پاک بنانے کے عزم کا اعادہ کیا گیا ہے۔