ماحول کا تحفظ مشترکہ ذمہ داری، سیکرٹری جنگلات بلوچستان

کوئٹہ ( بلو چستان خبر) سیکرٹری جنگلات و جنگلی حیات عمران گچکی نے کہا ہے کہ ماحول کا تحفظ صرف حکومت کی نہیں بلکہ ہر شہری کی مشترکہ ذمہ داری ہے اور آنے والی نسلوں کے بہتر مستقبل کے لیے اس پر فوری توجہ دینا ضروری ہے۔یوم ارض کے موقع پر گفتگو کرتے ہوئے انہوں نے کہا کہ بلوچستان کے وسیع قدرتی مناظر، منفرد جنگلات اور متنوع جنگلی حیات صوبے کا قیمتی اثاثہ اور فخر ہیں، جن کی حفاظت ہم سب پر لازم ہے۔انہوں نے کہا کہ ماحولیاتی تحفظ کے لیے عوامی شعور اور عملی اقدامات ناگزیر ہیں، کیونکہ صرف سرکاری اقدامات اس مقصد کے حصول کے لیے کافی نہیں ہو سکتے۔سیکرٹری جنگلات نے اس عزم کا اظہار کیا کہ اگر آج قدرتی وسائل کا تحفظ یقینی بنایا جائے تو آئندہ نسلوں کے لیے ایک محفوظ اور بہتر ماحول فراہم کیا جا سکتا ہے۔انہوں نے عوام سے اپیل کی کہ وہ یوم ارض کے موقع پر اپنے قدرتی ورثے کے تحفظ کے لیے بھرپور کردار ادا کرنے کا عہد کریں۔