کوئٹہ: بلوچستان حکومت نے ورلڈ بینک کے تعاون سے صوبے بھر کی طالبات کے لیے 400 مکمل فنڈڈ اسکالرشپس کا اعلان کر دیا ہے، جسے خواتین کی تعلیم اور بااختیار بنانے کی جانب اہم قدم قرار دیا جا رہا ہے۔
یہ اسکالرشپس ان طالبات کے لیے مختص ہیں جو انٹرمیڈیٹ مکمل کر چکی ہیں اور چار سالہ بی ایس ایجوکیشن یا بی ایڈ پروگرامز میں داخلہ لینا چاہتی ہیں۔
اہلیت اور یونیورسٹیوں میں داخلے
اس پروگرام میں بلوچستان کے تمام اضلاع سے تعلق رکھنے والی طالبات درخواست دے سکیں گی جبکہ عمر کی حد 22 سال مقرر کی گئی ہے۔
منتخب طالبات کو پاکستان کے بڑے تعلیمی شہروں کراچی، لاہور اور اسلام آباد کی اعلیٰ جامعات میں تعلیم حاصل کرنے کا موقع فراہم کیا جائے گا۔
مکمل تعلیمی اخراجات حکومت ادا کرے گی
حکام کے مطابق اسکالرشپ پروگرام کے تحت:
- ٹیوشن فیس
- یونیورسٹی اخراجات
- دیگر تعلیمی اخراجات
مکمل طور پر حکومت اور اس کے شراکت دار ادارے برداشت کریں گے۔
بلوچستان حکومت نے اس منصوبے کو صوبے میں خواتین کی تعلیم، پیشہ ورانہ تربیت اور سماجی و معاشی ترقی کے لیے ایک اہم سنگ میل قرار دیا ہے۔